LAKON / DIALOG : Masisisean di Acara Marhata Sinamot

by IDRS May 28, 2021 0 comments

 

LAKON : Masisisean di Acara Marhata Sinamot

 

PARBORU I :
Gokhon sipaimahon, joujou  sialusan.
Di gokhon dohot jou jou muna di parpunguanta sadarion denggan ma hamu marboa-boa.

PARANAK III :
Raja nami raja bolon, ia parpunguanta dibagasan tingki on sigabe-gabe sihoras-horas do.

PARBORU I :
I ma tutu raja ni boru, sigabe-gabe jala sihoras-horas do tutu. Parjolo ma hita mandok mauliate tu amanta na martua Debata, dilehon dihita hahipason boi hita marpungu-gabe marpungu-horas di alaman pangantaran ni anak dohot pangantaran ni boru on.
Asa rampak songon na hundul,
siudur songon na mardalan.
Asa tangkas ma uju purba,
tangkas ma uju angkola.
Tangkas ma na maduma,
tumangkasan ma na mamora.
Si gabe-gabe jala si horas-horas parpunguanta sadarion, dia laklak na, dia unok na. Dia hata na dia nidokna, tangkas ma hamu marboa-boa.

PARANAK III :
I ma tutu raja ni hula-hula, di ari na salpu jala di bulan na salpu i, ro anak nami mardalan-dalan tu huta ni  raja i. Jala pajumpang ma dohot boru ni raja i.
Astuanna raja nami, masi haholongan ma nasida. di pabotohan anak nami ma tu natorasna. Jala nunga masi paolo-oloan nasida, jala sisada roha nasida, naeng mamungka parbogason. Las do roha nami songon natoras. Hu dongkon hami ma tu anak nami asa ro hami dohot anak nami tu bagas ni hula-hula i laho manungkun sinamot na naeng sipasahaton nami tu hula-hula I, i do apala sitangkasna raja nami.

PARBORU III :
I ma tutu raja ni boru, nunga tangkas hamu marboa-boa, ia parpunguanta di bagasan sadarion I ma na naung sisada hata do hape boru nami na naeng parumaen muna, dohot anak muna na naeng gabe hela nami laho mamungka parbogason. Hami pe las situtu do rohanami. Gabe-jala horas ma tutu anak muna dohot boru nami di na naeng ma mungka parbogason i.
Asa arirang ma di ginjang,
partanggalan ma di toru,
asa padan nasida na so jadi sirang
tondi masigomgoman.
Ia nagkiningan didok hamu naeng pasahathon sinamotni boru nami, ba hami pe las do roha nami, godang ma bahen hamu sian i.

PARANAK I :
Raja nami raja bolon,
Ndang sundat pudung ala so palia,
ndang sundat uhum ala sinamot sosadia.
Rambu pinungu ma raja nami hupasahat hami tu hamu.

PARBORU III :
Nauli raja ni boru.  Parsinamot hibul hamuna hape, lehon hamu ma hodana, lehon hamu ma lombu na, godang ma pasahat hamu sian i.

PARANAK I :
Raja nami raja bolon, ai nggo roha nami, tung godang do naeng pasahaton nami, alai hansit do tangan mandanggurhon na soada, tung sadia pe pasahat hami tung uli ma rohani raja i manjalo.

PARBORU II :
I ma tutu, uli do roha nami manjalo,
Nunga pitu lili nami,
paualuhon jobia nami.
Nunga uli roha nami,
adong hamu boru pangalualuan nami.
Ai anggo pangidoan nami, ba lehon hamu ma sian i dua ratus juta.

PARANAK II :
I ma tutu, ai anggo roha nami raja nami, lehonon nami do dos tu pangidoan ni raja i, alai tangkas do songon indahan di balanga, ia hami pamoruan muna on, ba angka na marniang do, angka na manghais martuduk do. Ai boha raja nami molo 20 juta ma hupasahat hami tu raja i?

PARBORU II :
I nama na tarbahen hamuna? Ba molo songon i hupasahat ma jo hataon tu dongan tubu nami na adong dison.
Ai boha hita na mardongan tubu, hupangido do nian 200 juta si namotni boru ta, alai didok pamoruan ta 20 juta do ninna na tarbahen nasida. Hata on pinasahatma ma tu hita na mardongan tubu.

PARBORU IV :
Ala naung dipasahat hamu hataon tu hami, ba hami pe nian ingkon do lehononni nasida 200 juta, hape didok nasida 20 juta. Ndang pola 200 juta, ba nanggo apala 100 juta ma . Ba ima nian pangidoan nami.

PARANAK II :
Nauli do i nian amang pangidoan muna i, alai nang pe songon i, huboan do tong  dongan tubu ku dison, pinasahatma hataon tu dongan tubu nami.
Nunga tangkas hita umbegesa, di pangido hula-hula i 100 juta. Boha hita tu pangidoan ni hula-hula ta i?

PARANAK IV :
I ma tutu, nauli do i pangidoan ni raja i ba ahu pe nuaeng mandok, ba ta panangkokma. Tolu pulu juta ma tapasahat.

PARBORU I :
I ma tutu, ala huboan hami do dongan sahuta nami dison, tu hamu na raja ni dongan sahuta nami, pinasahat ma hataon tu hamu, bahen hamu jo pandohan muna sian i.

PARBORU IV :
Balintang ma pagabe,
tumundalhon si tadoan.
Arimuna do gabe,
ai tangkas hamu hiuda hami masipaolo-oloan.
Ia hami pe, sian dongan sahuta, ba 70 juta ma nian diehon raja ni boru ta tu hita. Hataon pinasahat ma tu hamuna raja ni boru.

PARANAK III :
Tu hamu dongan sahuta nami, nunga huelek hami nian raja ni hula-hulai asa 30 juta tapasahat tu nasida. Ba onpe nuaeng pinasahat tu dongan sahuta nami.

PARANAK IV :
Ba hami pe sian dongan sahuta ba rela do hami laho manambai, ai boha rajani hula-hula i, hudok hami pe annon tu pamoruan muna asa 40 juta ma nian dipasahat nasida tu raja ni hula-hula i. Ba hataon pinasahatma tu hula-hula i.

PARBORU I :
Tu hamu boru nami, na huboan hami sian huta nami, tangkas do  tabege, ia pihak ni pamoruan nami na naeng raja ni boru nami, naeng pasahathon sinamotni anggi muna 40 juta. Hupangido hami nian nanggo 70 juta, hape didokhon na naeng pamoruan nami 40 juta. Hataon pinasahat tu raja boru nami na niboan hami sian huta.

PARBORU IV :
Jadi anggo hami raja nami, Sitolopi nauli sitolopi na denggan do ianggo hami, da dia na pinaborhat ni tangiang I, ba i ma di pasahat nasida.

PARBORU III :
Jadi i nama sian hamu (mandok tu boruni parboru). Jadi mauliate ma tu hamu pamoruan nami, molo i nama sian hamu. On pe hataon hupasahat hami ma nuaeng tu hamu raja ni pamoruan nami.

PARANAK III :
Nauli ma i raja nami, jadi hami pe ala huboan hami do boru nami dison, ba hataon nuaeng hu pasahat hami ma tu boru nami.

PARANAK IV :
Mauliate ma tu hamu raja ni hula-hula nami ala dilehon hamu sangap tu hami (mandokhon tu raja ni parboru). Jadi ianggo hami nangkiningan didokhon hamu 40 juta naeng pasahaton hamu tu hula-hula I, ba gohi hamu ma da 50 juta. Ba molo hurang, hami boru on pe manggohi i annon di ulaon i.

PARANAK I :
Mauliate ma tu hamu pamoruan nami, ala adong do hamu pangalualuan nami, didokhon hamu 50 juta, las do roha nami di si. Jadi onpe raja name, nunga di gohi pamoruan nami 50 juta, gabehon raja i ma sian i.

PARBORU III :
I ma tutu, gabe jala horas ma di hita saluhut na ala naung adong do di hita kata sepakat, asa
Balintang ma pagabe,
tumundalhon si tadoan.
Arita do gabe,
ai tangkas hita masipaolo-oloan.
Ba onpe tu hamu raja ni boru, pasahat hamu ma tuson sinamotni boru nami i.

(Dipasahat ma sinamot i di bagasan piring na marisihon boras si pir ni tondi)

Dungkon di jalo raja parboru sinamot i dibahen ma umpasa :

Boras sipirni tondi,
Binuat sian piring.
Debata ma na manggohi,
Tuhan Jesus ma mangiring-iring.

Sitik tik ma si gompa
Hodong lais ni ruma
Tung songon dia pe godang ni sinamot na
Sai godang ma pinasu na

PARBORU II :
Ai boha raja ni boru, nunga gok be on sinamot on?

PARANAK I :
Patujoloni sinamot do on raja nami di pesta nai ma anggo panggohina.

PARBORU II :
Ai boha raja ni boru,  adong si pangidoan muna?

PARANAK II :
Raja nami raja bolon, ianggo hami nian ris do hami ulosan muna.

PARBORU I :
Nauli raja ni boru, ris do hamu ulosan nami. Hira-hira piga ma ulos pasahaton nami tu hamuna?

PARANAK II :
Ba godang ma pasahat hamu sian i.

PARBORU I :
Nunga boi 6 ate?

PARANAK I :
Pangidoan nami nian nanggo apala 11 ulos pasahat ham utu hami.

PARBORU II :
Ba nauli ma i raja ni boru, hupatupa hami pe 11 ulos songon pangidoan muna i. ~
~Jadi ala naung sidung hita manghatai ba onpe nuaeng tu hamu raja ni pamoruan nami, pasahat hamu ma sian i ingot-ingot.
(Paranak memberikan kurang lebih 300 ribu kepada pihak parboru, kemudian parboru memberi setengah dari ingot-ingot tersebut).

Ba nunga dipasahat hamu nuaeng ingot-ingot tu hami ba sude ma hita mangingot ulaon pesta di ari na naeng ro. Jala onpe nuang pasahat hamu ma sian i upa panggabe ai manggabei do angka raja. (paranak memberi 200 ribu, parboru memberikan 100 ribu).

PARANAK I :
Ala naung simpul do parhataan di bagasan sadarion onpe nuaeng , hupangido hami ma tu  raja i asa hula-hula i manutup di bagasan tangiang.

 

 

Martangiang

PARBORU IV :

Martangiang ma hita. Mauliate puji-pujian ma di ho ale Tuhan Debata ama nami na di banua ginjang. Nunga simpul be Tuhan simpul panghantaion nami na marhula boru di bagasan dame na sian ho i. Asi ma roham nang tu ulaon na marudut dope tongtong ma ho na manjongjongi ulaon nami sahat tu ujung na. Asi ma roham bahen ma anak dohot borumi gabe keluarga na hinalomohonmu di joloan ni ari. Asi ma roham pasupasu ma hami dohot denggan basami. Sesa dosa pangalaosian nami na godang i marhite Jesus Kristus Tuhan nami jalo ma tangiang nami mauliate ma di ho Tuhan, Amen.

Sc : My Father<3

💝💝💝Semoga Bermanfaat💝💝💝